دەربارەی من

لە لایەن ئارمان خلیل

دەربارەی من (لە پەیوەندیدا بە فیزیاوە)

ناوم ئارمان-ە. دەرچووی بەشی فیزیای کۆلێژی زانستی زانکۆی سلێمانیم. خولیایەکی زۆرم بۆ تێگەیشتن لە گەردوون و بە گشتی پرسیارە گەورەکان هەیە، هەر ئەمەش هۆکاری هەڵبژاردنی فیزیکە لە ناو هەموو شتەکانی تردا. لە ناو فیزیکیشدا ئەوەی زۆر تایبەتە لە لام، فیزیکی تەنۆلکەیی و کۆزمۆلۆژی-یە. لە هەوڵدام و ئامانجم ئەوەیە بتوانم وەک توێژەرێک کار لەسەر کێشە بنچینەییەکانی ئەو بوارانە بکەم. پێشووتر وەک وانەبێژ لە ئامادەیی ‘ڕەز’ی کچان، وانەی فیزیای پۆلی ١٠ـم وتۆتەوە و دواتریش لە کۆلێجی سەڵاحەددینی ئەییوبی کوڕان لە شاری سلێمانی وانەی فیزیام بە خوێندکارانی پۆلی ١١ وتۆتەوە. لە ئێستادا وەک یاریدەری توێژینەوە لەگەڵ گروپێکی توێژینەوەی کۆزمۆلۆجی کار دەکەم کە سەر بە زانکۆی یانگژوی وڵاتی چینە. هەروەها لە کتێبخانەی ڕێی کاکێشان لە شاری سلێمانی لەگەڵ دکتۆر مێهران-ی برام کار دەکەین بۆ دابینکردنی کتێبی زانستی، پزیشکی و بە گشتی کتێبە مەنهەجییەکان یان هەر کتێبێکی ئینگلیزی بوارەکانی تر.

بە گشتی لە زانکۆ تەنها یەک شتی زۆر گرنگم بۆ دەرکەوت و فێری بووم. ئەویش ئەوە بوو کە فیزیا و زانست چی نییە و نابێ چۆن پێیەوە خەریک بم ئەگەر بمەوێت ببم بە فیزیاییەک یان کەسێکی زانستیی ڕاستەقینە. بۆیە هەر زوو بە تەواوەتی وازم لەوە هێنا  کە زۆربەی کاتەکانم تەرخان بکەم بۆ سەرقاڵبوون بەو هەموو بێکەڵکییەی کە لە زانکۆ دەگوزەرێت کە زۆر زۆر دوورە لەوەی هیچ کەسێک بتوانێت بە پەیڕەوکردنی ئەوەی ئەوێ بە هیچ بگات. ئەوەش لە هەندێک ڕووەوە خراپ بەسەرمدا شکایەوە، بەوەی کە لە چەندین دەرس و چەند ساڵ دەرنەچووم و بەمەش هەم خۆم تووشی زەحمەتێکی زۆر کرد و هەم کەسە نزیکەکانم بێزار کردووە. هەڵبەت لەو کاتەوەی کە وازم لە سەرقاڵبوون بەوەوە هێناوە کە لە زانکۆ دەگوزەرێت، بێکار دانەنیشتووم و وازهێنانەکەم لە خەریکبوون بە ئەوێوە هۆکاری ئەوە بووە کە نەمتوانیوە خۆم بخەڵەتێنم بەوەی لەوێ دەگوزەێت و ئەوە تێری نەدەکردم، دوای درککردن بەوە، هەمیشە هەوڵمداوە بزانم باشترین ڕێگا لە دەرەوەی ئەو سیستەمە بێ بەرهەمە بۆ ئەنجامدانی ئەمە واتە بۆ بوون بە فیزیایی چییە و شتی زۆر باشم بۆ ڕوون بۆتەوە. جگە لەوەش هەمیشە ئەو پرسیارەم لە بیر بووە کە ئایا بە تەنها سەرقاڵبوون بە فیزیا و بە گشتی زانست وەڵامە بۆ ویستەکانی من؟ زۆر بە سادەیی ئایا فیزیا بەسە؟ چیتر هەیە وەڵامی ئەو پرس و کێشانە دەداتەوە کە لای مرۆڤ گەڵالە دەبن و هەموو دەم لە خەیاڵیدا دێن و دەچن تا وای لێدێت بە ویستی خۆی دەبنە هەموو ئەوەی کە مانایەکیان هەیە لە ژیایندا؟ تا ئێستا لەم بێنەوبەرەیەدا لەگەڵ خۆم، فیزیا هەر لە جێی خۆی ماوە، بەڵام فەلسەفە زۆر سەرنجی ڕاکێشاوم، هەستکردن بە گرنگیی فەلسەفە و بینینەوەی بەشێکی هەرە گەورەی کێشەکانی خۆم لە فەلسەفەدا بۆ من وەک دۆزینەوەی گەنجینەیەکی بێ ئەندازە گەورە بوو، گەنجینەیەک کە بەداخەوە زۆر زۆر درەنگ بە هەبوونیم زانی. هەرچەند تا ئێستا تەنها توانیومە زۆر ڕووکەشانە و بە گشتی شتێک دەربارەی بزانم و زۆر کەم دەرفەت هەبووە سەرقاڵ بم پێیەوە، نەک لەبەر ئەوەی نەمویستووە، بەڵکو لەبەر ئەوەی زۆر دواکەوتووم لە هەموو شتەکانی تر و دەرفەت نەبووە. بۆیە لە ئێستادا زۆربەی کاتەکانم بۆ قەرەبووکردنەوەی هەموو ئەو دواکەوتنانە تەرخان دەکەم. هێند نابێت کە زۆر بە چڕی دەستم کردۆتەوە بە خوێندنەوەی سەرلە نوێی فیزیک و ماتماتیک و فەلسەفە و زۆربەی کاتەکانم بۆ ئەوانە تەرخان دەکەم، هەر بۆیە بێ ئەندازە کاتم کەمە و تەنانەت ناتوانم کاتی پێویست بۆ نزیکترین کەسەکانیشم تەرخان بکەم. ئەوەی زۆر بێزارم دەکات ئەوەیە کە کاتم بە فیڕۆ بچێت، جا بە هەر هۆکارێک بێت لە دەرەوەی ئەمە. ئەوەی لەمە زیاتر بێزارم دەکات ئەوانەن کە پێیان وایە ئەمەی من دەیکەم بێهوودەیە یان ئەوانەی پێیان وایە من کە لە دەرەوە و لە کاتەکانی خۆمدا سەرقاڵی ئەمانەم هێند کارێکی گرنگ ناکەم و دەتوانن هەر کاتێک ویستیان لە کاتم بگرن، چونکە وەک وتم لە تێڕوانینی ئەواندا هەموو کاتێک بێکارم و ئەوەی دەیکەم شتێکی ئەوتۆ نییە! بەهەرحاڵ ئەمە ڕێگایەکی دوور و درێژە و هیلاکبوونێکی باشی دەوێت. ئەم بلۆگەش تەنها خەمخۆرییەکی بچوک و تەرخانکردنی بەشێکی کاتەکانم و هەوڵێکە بۆ بەشداری پێکردنی ئەوەی پێیەوە خەریکم لەگەڵ هەموو ئەوانەی دەیبینن یان ئەوانەی وەک خۆمن و بە هەمان ڕێدا دەڕۆن یان ئەوانەی دواتر دەیانەوێت هەمان ڕێ بگرنە بەر.

وێبسایتی کاکێشان | فیزیک